Hunorde
E suwaahiliire 'maneno' no faandii 'konnguɗi'.
Ko konnguɗi woni faandaare Maneno nden fow: lowre (tufnde) enternet sincanaande denndaangal mayre ngam laataade nokkuure jokkondiral kanyum e bulooguuji newaniinde hatonjinal winndooɓe buloogu e wallifotooɓe Afirik mo Ɓaleeɓe.
Ko fii honɗum dinngiral buloogu kesal addanaa si tawii dinngire goɗɗe no heewi? Afirikiyankooɓe ɓen ko emmbere 1% e wanngotooɓe enternet adunaaru ndun, fahin e ɓen ɗon no famɗi jogiiɗo buloogu. Maneno no faalaa tiindaade saɗteendeeji e baŋŋe karallaagal (tekniki) ɗi huuwtortooɓe dinngire buloogu woowi hawrude e mum e nokkuuje adunaaru ndun ka tokkagol e enternet on newaaki maa yaawaa, tawta ɗon kadi faandaare sincugol yuɓɓo saakitirgo binndol e jannde e dow wallitorgol ngaandi hiisorgal (ordinateer) wonande yimɓe Afirik mo Ɓaleeɓe.
Oo porojee tuugiiɗo e njuɓɓudi hoyndi (hayfundi), ndi sincuɓe Maneno ɓen tigi fuɗɗori haajitorde, ko e hitaande 2008 feenyi. Ko nden hoyeende waɗi si yuɓɓo ngon no newanii hay jogiiɓe tokkondiral enternet neeɓungal. Maneno no yaawi henndaade no yaawi udditeede, sabu hoyeende mum nden kono e hoore ɗum kadi hino jogii denndaangal pehe nafooje taweteeɗe ko woowi e bulooguuji. Himo walla kala winndiiɗo e makko no ontigi heɓira tummbere mum heertiinde ka njuɓɓudi tawa tokkondiral enternet neeɓungal haɗataa konngol ontigi naneede.
Ko ɓuri ɗemɗe 2 000 hino wowlee e duungal Afirik, ɗum e wonde, jokkondiral fonndoowal ɗemɗe seertuɗe ko alhaali heewɗo yejjiteede ɗon. Maneno no okka feere yaltingol winndannde wootere waylaande e nooneeji limti-limtinɗi e ɗemɗe seertuɗe, tawa ɗum no heɓoo e dow newaare ɓayri nooneeji ɗin no joɗɗindinaa nokkuure wootere. Hino eɓɓaa firugol njuɓɓudi ndin fodde baawɗe e ɗemɗe Afirik ɗuuɗuɗe, fii moomtugol keeri fuɗɗiiɗi layugol hakkunde leyɗe, teentii non nde tawnoo Geese (Web) on hannde ko ɓuri jaalaade kon ko enngeleere woni e mum.
